مەملەكەت باسشىسى قاسىم-جومارت توقايەۆ كۇندەلىكتى كوروناۆيرۋسقا تەست تاپسىرىپ جاتىر. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي Facebook پاراقشاسىندا جازدى.
– سوڭعى كۇندەرى مەملەكەت باسشىسى قاسىم-جومارت توقايەۆتىڭ دەنساۋلىعىنا قاتىستى ەلىمىزدىڭ كوپتەگەن ازاماتتارى الاڭداۋشىلىق ءبىلدىرىپ، ساۋال جولداپ جاتىر. وسىعان وراي، قاسىم-جومارت كەمەل ۇلىنىڭ دەنساۋلىعى جاقسى ەكەنىن حابارلايمىن. سوڭعى كەزدەردەگى ەپيدەميولوگيالىق جاعدايدىڭ ءورشي تۇسۋىنە بايلانىستى، ول كۇندەلىكتى كوروناۆيرۋسقا تەست تاپسىرىپ جاتىر. تاپسىرىلعان بارلىق تەست سىناماسى تەرىس ناتيجە كورسەتتى، – دەدى ب. ءۋالي.
سونىمەن قاتار ول مەملەكەت باسشىسىنىڭ قوعامدىق ۇيىمداردىڭ وكىلدەرىمەن ونلاين-كەزدەسۋ وتكىزىپ جۇرگەنىن اتاپ ءوتتى.
– مەملەكەت باسشىسى ءوزىنىڭ قىزمەت ورنىندا بەلگىلەنگەن جۇمىس كەستەسىنە سايكەس، مەملەكەتتىك ورگاندار مەن ۆەدومستۆولاردىڭ باسشىلارىمەن جانە قوعامدىق ۇيىمداردىڭ وكىلدەرىمەن ونلاين-كەزدەسۋلەر وتكىزۋدە. قازاقستان پرەزيدەنتى تۆيتتەر ارقىلى ەلباسى نۇرسۇلتان ءابىش ۇلى نازاربايەۆتىڭ تەزىرەك ساۋىعىپ كەتۋىن تىلەپ، تۇڭعىش پرەزيدەنتتىڭ وزىنە ءتان مىقتى رۋحىنىڭ ارقاسىندا، بۇل سىناقتى دا جەڭىل ەڭسەرەتىنىنە سەنىم ءبىلدىردى، – دەپ جازدى ول.
پىكىر قالدىرۋ